Ветераните на Работнички одиграа пријателски меч со тимот на Мобилност Македонија
Ветераните на фудбалскиот клуб Работнички одиграа пријателски натпревар со тимот на Мобилност Македонија. Мечот заврши 3-3, но во преден план секако е поддршката што клубот ја дава на Националниот сојуз на лица со телесен инвалидитет на Македонија – Мобилност Македонија. Натпреварот се одигра на 23.09.2017 година на стадионот на ФК Работнички во Градскиот парк во Скопје.
„Им благодариме на фудбалерите – ветерани и на членовите на управата на ФК Работнички за пружената рака на поддршка, како и на нашите момчиња за залагањето, фер и коректната игра. Националниот сојуз на лица со телесен инвалидитет на Македонија – Мобилност Македонија со формирање на фудбалски тим од свои членови, прави скромни чекори во фудбалскиот свет и се надеваме дека за некого овие чекори ќе значат скок до трибина“, велат од Мобилност Македонија.
Мобилност Македонија заедно со Фудбалската федерација на Македонија се вклучија во проектот на УЕФА – „Капитени на промени“. Проектот се спроведува во голем број на европски земји. Целта на овој проект е да се влијае на креирање на еднакви можности за сите во фудбалскиот свет, без разлика на полот, религијата, националната припадност и физичката способност. „Капитени за промени“ е проект кој се однесува и на креирање на непречен пристап за лицата со инвалидитет на стадионите во Македонија, затоа што фудбалот е спорт за сите и треба да биде достапен за секого.
