Четвртфинален куп предизвик против Шкендија
Работнички денеска (14 часот) го игра реванш натпреварот од четвртфиналето на Купот на Македонија. Противник е Шкендија, а првиот меч во Тетово заврши 1-1. Тоа е релативно поволен резултат за нашиот тим, но секако отворен за голема битка и на вториот дуел на арената „Тодор Проески“.
Составот на Ратко Достаниќ оваа пролет има поинаков лик, забележа две победи и едно реми во првенството, а Купот е можеби шанса и за излез на меѓународна сцена.
„Ова е нов предизвик за нас, верувам дека тимот ќе го даде максимумот“, вели шефот на стручниот штаб, Ратко Достаниќ.
Капитенот Горан Силјановски верува дека Работнички може да одигра квалитетно и да ја оствари целта.
„Имаме поволен резултат по првиот натпревар, но има уште тешки 90 минути за игра. Подготвени сме, ќе се потрудиме да ја изненадиме Шкендија и да се пласираме во следната рунда“, вели Силјановски.
Мечот меѓу Работнички и Шкендија е закажан за 14 часот на арената „Тодор Проески“, а ќе го суди Васко Мавров од Струмица. Натпреварот ќе се игра без присуство на публика.
