Прелчец: Шкупи се бори за врвот, но не е поквалитетен од сегашниот Работнички
Работнички одигра реми без голови против лидерот Шкендија, а веднаш следи и дуел со второпласираниот тим на табелата, Шкупи. Напаѓачот Никола Прелчец кој во зимскиот преоден рок го засили нашиот клуб од редовите на Борец, смета дека Шкупи во моментот не е поквалитетен од сегашниот тим на Работнички. Очекува „романтичарите“ да освојат бодови на утрешното гостување.
„Секоја чест за Шкупи, тоа е тим кој се бори за самиот врв на табелата, но исто така и имаше многу промени во кадарот во текот на зимската пауза. Мислам дека во моментот Работнички е најмалку на исто рамниште по квалитет и доколку одиграме тактички мудро и ги исполниме задачите на тренерот Александар Влахо можеме да оствариме позитивен резултат“, порачува Никола Прелчец.
Натпреварот од 22.коло во Првата фудбалска лига меѓу Шкупи и Работнички е закажан за утре, со почеток во 14 часот, на комплексот на ФФМ, а ќе го суди Александар Ставрев.
