Работнички денеска доживеа убедлив пораз од 0-3 во пријателскиот натпревар против албанскиот прволигаш Партизани Тирана, кој се одигра во Струга. Тимот на Бојан Маркоски сѐ уште не успева да ја стабилизира одбраната, што беше клучен фактор за убедливиот резултат.
Гостите поведоа уште во 18-тата минута преку Кеко од пенал, кој беше досуден по грешката на голманот Васко Василев, кој при обид да ја исфрли топката, направи фаул врз противнички играч.
Само шест минути подоцна, уште една грешка во одбраната, овојпат од новото засилување Амир Велиќ, му овозможи на Скука да зголеми на 0-2.
Во завршницата од мечот, во 87-та минута, судијата досуди уште еден, доста сомнителен пенал за Партизани. Василев успеа да го одбрани првиот обид, но Гарсија ја вметна одбиената топка во мрежата за конечни 0-3.
Ова е прв пораз за Работнички во летниот подготвителен период, по реми натпреварите против Силекс (0-0 во Кратово и 1-1 во Скопје). Следниот тест е закажан за 27 јуни против косовскиот тим Балкани во Охрид.
