Работнички ја завршија својата европска авантура во првото квалификациско коло од Конференциската лига, откако и на реванш-средбата загуби од белорускиот Торпедо Белаз, овојпат на домашен терен со 0-1.
По натпреварот, тренерот на Работнички, Бојан Маркоски, даде искрена и реална анализа.
„Честитки за екипата на Торпедо Белаз. Се покажа дека подобриот тим оди понатаму. Беа подобри и поискусни, и јасно е дека се во натпреварувачка форма. Ние сè уште ја бараме својата вистинска форма пред почетокот на сезоната. Имаме потенцијал, но ни претстои уште многу работа. Ова натпреварување беше важно искуство и голема лекција за сите нас“, изјави Бојан Маркоски.
За Работнички останува да се фокусира на подготовките за новата сезона во домашното првенство, со надеж дека стекнатото искуство од европските настапи ќе помогне да се изгради поцврст и поконкурентен тим на домашната сцена.
