Значаен триумф над Македонија ЃП: Рутина од Кире Маркоски и „бомба“ на Најденов
Работнички успеа слави триумф од 2-1 над Македонија Ѓорче Петров, во натпревар од десеттото коло во Првата фудбалска лига. Иако имаше негатива по првиот дел (0-1) и во последните дваесетина минути играше со играч помалку поради исклучувањето на Леон Најдовски, сепак, нашиот тим стигна до трите бода. Кире Маркоски и Бојан Најденов беа стрелци на головите за Работнички.
Македонија ЃП прва се закани. Кристијан Стојкоски во 15.минута излезе сам пред голманот, но Даниел Божиновски со пад во нозе одбрани и го спаси својот гол.
Осум минути подоцна, гостите дојдоа во водство, а стрелец беше Јашароски. Здравковски нафрли од слободен удар, во шеснаесетникот највисоко скокна Ален Јашаровски и со удар со глава ја затресе мрежата на Божиновски.
Работнички се обиде да израмни преку Херера од слободен удар, потоа и преку Елиф Елмас, но гостите заминаа со предност на полувремето.
Тренерот Виктор Треневски на почетокот на второто полувреме ги уфрли во игра Кире Маркоски и Нигериецот Адешина, а повторно Македонија ЃП прва се закани преку Кристијан Стојковски. Во 50.минута тој шутираше за малку непрецизно од 15 метри.
Во 58.минута, Работнички го израмни резултатот. Нововлезениот Кире Маркоски се реши да шутира од 20 метри, и ја смести топката на вистинското место.
Во 73.минута, Работнички остана со играч помалку, откако судијата Александар Ставрев му покажа директен црвен картон на Леон Најдовски.
Но, и со играч помалку, во четвртата минута од судиското продолжение, Бојан Најденов со прецизен шут од слободен удар донесе триумф од 2-1 и нови три бода за нашиот состав.
РАБОТНИЧКИ – МАКЕДОНИЈА ЃП 2-1 (0-1)
Арена „Филип втори“. Гледачи: 300. Судија: Александар Ставрев (Скопје). Стрелци: Маркоски 58’, Најденов 90+4’ (Работнички), Јашароски 23’ (Македонија ЃП). Ж. картони: Херера, Трајчевски, Силјановски, С. Сахити (Работнички), Јарароски, Цветановски, Здравковски, Костовски, Чешмеџиев, Ристовски (Македонија ЃП). Црвен картон: Леон најдовски (Работнички).
РАБОТНИЧКИ: Божиновски, Силјановски, Митрев, Најдовски, Херера, Трајчевски, Најденов, Дурански (46’ Маркоски), С. Сахити (84’ Наумчевски), Елмас (46’ Адешина), Ивановски.
МАКЕДОНИЈА ЃП: Целески, Т. Стојковски, Чешмеџиев, Рамадан, Ристовски, Серафимовски, Цветановски (71’ Лазаревиќ), Здравковски, К. Стојковски, Костовски (65’ Хаџија), Јашароски (85’ Аломеровиќ).
