Младите носат радост и освојуваат трофеи
Фудбалската академија на Работнички е една од најдобрите во Македонија во изминатата деценија, а тоа се потврди и оваа сезона. Младинските тимови освоија трофеи и донесоа голема радост за клубот. Иднината воопшто не е доведена во прашање.
Младинската селекција на Работнички го освои Купот на Македонија, совладувајќи го тимот на Академија Пандев во Охрид со 3-1. Елиф Елмас беше стрелец на два гола за нашиот тим, во листата на стрелците се запиша и Фазлиу, а почесниот погодок за Академија Пандев беше дело на Трапановски.
Работнички е освојувач на Купот на Македонија и во кадетска конкуренција. Избраниците на тренерот Горан Станковски во финалето беа подобри од Академија Пандев со убедливи 3-0. Стефан Богдановски, Марио Станковски и Миле Тодоров беа стрелци за младите „романтичари“ на овој финален дуел.
Работнички играше во финалето на Купот и во пионерска конкуренција. Противник беше Вардар, кој во самата завршница успеа да стигне до триумф од 2-1 и да го освои пехарот, иако нашиот пионерски тим имаше водство од 0-1.
