Работнички се враќа на европската сцена по пауза од седум години, со надеж за успешен настап. Тренерот Бојан Маркоски е уверен дека неговите избраници можат да излезат со поволен резултат против белорускиот тим Торпедо-Белаз.
„Дојде време за европскиот предизвик. Темелно се подготвувавме, детално го анализиравме противникот. Торпедо-Белаз има квалитет, но нашата цел е да го започнеме ова европско лето со позитивен резултат. Имам доверба во моите играчи и сигурен сум дека ќе дадат сѐ од себе за да ја оствариме зацртаната цел. Сакаме да се вратиме во Скопје за реваншот со предност и со реални шанси за пласман понатаму. По седум години повторно играме на европска сцена, и тоа е дополнителен мотив за сите – и на овој натпревар во Унгарија и на реваншот дома“, изјави Маркоски.
Капитенот Бесир Демири, пак, е оптимист дека тимот има сили да го мине првото квалификациско коло.
„Уште од првиот ден на подготовките се фокусиравме на овој момент. Тимот е целосно подготвен, знаеме што сакаме и веруваме дека, ако ја исполниме тактичката замисла на нашиот тренер, можеме да стигнеме до посакуваната победа. Новите играчи добро се адаптираа, атмосферата во екипата е одлична и сите сме сконцентрирани на првиот меч против Торпедо-Белаз. Не очекува тежок натпревар, но веруваме дека ќе излеземе како победници“, рече Демири.
Мечот меѓу Торпедо-Белаз и Работнички се игра утревечер, со почеток од 20 часот, на стадионот на Халадаш во Сомбател, Унгарија.
