Во заостанатиот меч од 4. коло во Првата македонска фудбалска лига, Работнички загуби од Шкендија со минимални 0-1. Натпреварот се одигра на тренинг-центарот на ФФМ, а херој на тетовци беше Фабрис Тамба, кој во 67. минута го постигна единствениот погодок.
Првото полувреме мина без поголеми возбудувања. Алхасан се обиде со удар од далечина, но непрецизно, додека Далеј беше најблиску до гол за Работнички, но неговиот удар беше блокиран.
По паузата, Шкендија ја презеде иницијативата. Абега во 60. минута имаше одлична можност, но премногу ја одложи завршницата, па Мелиќи успеа да интервенира и да избие во корнер.
Сепак, гостите ја материјализираа надмоќта седум минути подоцна. Мазари одлично го пронајде Тамба во шеснаесетникот, кој со прецизен удар ја затресе мрежата. Ситуацијата беше проверувана преку ВАР поради сомнеж за офсајд, но погодокот беше потврден.
Работнички веднаш се обиде да се возврати. Димитар Трајков во 70. минута упати силен удар, но Гаје со извонредна одбрана со нога спречи израмнување.
До крајот резултатот остана непроменет, па бодовите ги освои Шкендија.
