Работнички доживеа пораз (0-1) од Струга Трим Лум во 27.коло од Првата фудбалска лига. Нашиот тим беше рамноправен во најголемиот тек од натпреварот, но едно невнимание во одбраната беше доволно за стружани да го постигнат победничкиот гол.
Првото полувреме мина без посериозни шанси, единствената ја имаше Компаоре, откако излезе сам пред Игор Алексовски по грешка во одбраната на Работнички. Сепак, репрезентативниот голман реагираше и со пад во нозе успеа да спаси.
На почетокот на вториот дел, Струга Трим Лум дојде во водство. Во 54.минута, по едно невнимание, Компаоре ја спушти топката до Хоган Укпа, кој успеа да ја затресе мрежата на Работнички.
По примениот гол, составот на Горан Станиќ тргна во офанзива, напаѓаше, но не успеа да создаде стопроцентна можност за израмнување.
